Kryetari i Qarkut Tiranë, z. Aldrin Dalipi nderoi me titullin “Mirënjohje e Qarkut” Drejtorinë Vendore të Policisë Tiranë.
“Në shenjë vlerësimi të lartë për përkushtimin, kurajën, forcën dhe sakrificën për të kryer me devotshmëri misionin e Policisë së Shtetit në respekt të ligjit, në shërbim të qytetarëve të Qarkut Tiranë!” thuhej në motivacionin e nënshkruar nga kreu u Qarkut, Aldrin Dalipi.
Me rastin e 107-Vjetorit të krijimit të Policisë Shqiptare në ambientet e Drejtorisë Vendore të Policisë Tiranë u zhvillua një ceremoni festive, ku pjesëmarrës ishin drejtues të Policisë, përfaqësues të pushtetit vendor, punonjës policie aktual e të dal në pension, si dhe familjarë të punonjësve të policisë të rënë në krye të detyrës.
Gjatë fjalës së rastit zoti Dalipi tha se Policia e Tiranës përballet me sfida të jashtëzakonshme në një territor ku është vendosur pjesa më e konsiderueshme e sipërmarrjes kombëtare dhe vendore, ku çdo ditë vendosen apo regjistrohen qytetarë të rinj, ku hyrjet me mjete dhe persona nga qarqet e tjera të vendit janë intensive.
Drejtori i Drejtorisë Vendore të Policisë Tiranë, Drejtues i Parë z. Rebani Jaupi, në fjalën e tij falënderoi dhe u shprehu mirënjohje të gjithë punonjësve të policisë për kontributin e dhënë në përmbushjen e misionit të Policisë së Shtetit.
Gjithashtu gjatë zhvillimit të ceremonisë u vlerësuan me “Certifikatën për Shërbime të Dalluara” gjashtë punonjës policie të Drejtorisë Vendore të Policisë Tiranë.
Z. Dalipi u shpreh me një falënderim dhe në rrjetin social twitter: “Policia e Qarkut Tiranë përballet me sfida të jashtëzakonshme në një territor ku është vendosur pjesa më e madhe e sipërmarrjes kombëtare dhe vendore. Siguria rrugore, sfidë e fortë. Përballja me krimin kërkon guxim. Ata ja kanë dale me kurajë e sakrificë.”
Policia e Qarkut Tirane perballet me sfida te jashtezakonshme ne nje territor ku eshte vendosur pjesa me e madhe e sipermarjes kombetare&vendore.Siguria rrugore,sfide e forte.Perballja me krimin kerkon guxim.Ata ja kane dale me kurajo e sakrifice. Faleminderit🙏 #107vjet pic.twitter.com/bia8Etu9D0
— Aldrin Dalipi (@AldrinDalipi) January 13, 2020
