Kryetari i Këshillit të Qarkut Tiranë, z. Aldrin Dalipi po merr pjesë në Asamblenë e Rajoneve Europiane (AER) që po zhvillohet në Bruksel.
Në ditën e parë të punimeve, Asambleja zgjodhi znj. Hande Özsan Bozatli si Presidente të Rajoneve Europiane.
Në fjalën e saj të parë përshëndetëse, znj. Bozatli theksoi se ndihej krenare për besimin duke thënë se ky është një impenjim që do ta bënte të reflektonte thellë, jo vetëm atë, por dhe organizatën që drejton dhe rolin e rajoneve në botën në të cilën jetojmë.
“Ne do të vazhdojmë të përfaqësojmë zërin e rajoneve në nivel evropian dhe do të promovojmë bashkëpunimin rajonal. Do të përqendrohemi në shqetësimet politike rajonale dhe lokale të natyrës pan-evropiane dhe të nxisim ekselencën e lidershipit në të gjitha nivelet e qeverisjes”, theksoi znj. Hande Özsan Bozatli.
Znj. Hande Özsan Bozatli u ndal edhe në çështjen e emigrantëve për në vendet e BE.
“AER dhe rajonet e saj anëtare kanë një rol të rëndësishëm në gjetjen e zgjidhjeve të bazuara në parimet e solidaritetit, partneritetit dhe ndarjes së përgjegjësive. Ne e dimë se çfarë do të thotë diversitet i kulturave, traditave politike dhe të menduarit së bashku”, tha znj. Bozatli.
Presidentja e re e Rajoneve Europiane shprehu bindjen se është realisht e mundur që njerëzit e kulturave dhe besimeve të ndryshme të jetojnë së bashku në paqe.
