Kryeqyteti priti sot edicionin e pestë të Maratonës së Tiranës, një nga eventet më të mëdha sportive në kryeqytet me pjesëmarrje sportistë profesionistë dhe amatorë nga gjithë bota. Përveçse një garë sportive, Maratona e kësaj të diele ishte edhe një ditë pa makina.
Maratona e Tiranës u zhvillua pas një viti pushim për shkak të pandemisë së Covid19, me të cilën u përball e gjithë bota. Në këtë Maratonë morën pjesë 2500 vrapues nga shumë vende të ndryshme të botës.
Maratona u zhvillua në 4 kategori, e para e quajtur ‘Marathon’ me gjatësi 42.1 kilometra, e dyta ishte “Half Marathon” me gjatësi 21 kilometra, dhe 2 garat e tjera “Tirana 10K” dhe “We too” që ishin më shumë motivuese se sa konkurruese.
Kryetari i Bashkisë së Tiranës, Erion Veliaj në fjalën e tij hapëse falenderoi të gjithë pjesëmarrësit nga Shqipëria dhe e gjithë bota, ndërsa theksoi se Tirana tani është zyrtarisht e hapur.
“Faleminderit që keni mbushur Tiranën plot me gëzim, falënderoj sidomos ata 1000 vetë që kanë ardhur nga 35 shtete të ndryshme, duke filluar nga Kosova, Maqedonia e Veriut , Presheva. Ne jemi zyrtarisht të hapur dhe rikthimi i maratonës pas viteve mungesë është ndoshta shenja më e bukur e një Tirane që do i rikthehet normalitetit e jetës aktive. Një mirëseardhje të zjarrtë për të gjithë ata që na vizitojnë për herë të parë. Shpresoj të rrini sa më gjatë dhe të vini sa më shpesh”, theksoi Veliaj.
Maratonën e përshëndeti dhe Kryetari i Qarkut Tiranë, Aldrin Dalipi me një postim të vecantë në Twitter duke u shprehur: “Super ditë për Tiranën! Mirënjohje banorëve të Tiranës që lanë makinat sot për të respektuar qytetin që vrapon e mbushet me oksigjen”
