Faza e dytë dhe tejet e rëndësishme për të rikuperuar pasojat e shkaktuara nga tërmeti janë vlerësimi i dëmeve dhe shpërblimi i çdo familjeje të dëmtuar.
Fillimisht ishte Këshilli Bashkiak i Tiranës me një mbledhje jashtë radhe që vendosi akordimin e një fondi prej 1 milion dollarë për të prekurit nga tërmeti.
U theksua se për të gjitha familjet e prekura do të ndiqet një politikë lehtësuese për rindërtimin e banesave.
Pas verifikimeve, të gjithë ata që duan të ndërtojnë me të njëjtën kubaturë (sipërfaqe), do të kenë procedura të përshpejtuara.
Ditën e sotme nën drejtimin e prefektit të Qarkut Tiranë u mblodh shtabi i emergjencave për vlerësimin e dëmeve.
Kryetari i Qarkut Tiranë, Aldrin Dalipi pas takimit tha se ka një përkushtim të të gjithë përfaqësuesve të nivelit qendror e vendor për të dhënë më të mirën për qytetarët.
Sipas tij tashmë me rëndësi është faza vlerësimit të dëmeve, vëmendja te njerëzit kudo ku kanë nevojë. Ai falënderoi të gjithë të strukturat e angazhuara.
