Transporti publik në Tiranë ka hyrë në një epokë të re. Bashkia e Tiranës nisi testimin e autobusit të parë elektrik, duke shënuar një hap të madh drejt modernizimit të transportit publik në kryeqytet, miqësor me mjedisin.
Në prani të kryetarit të Bashkisë së Tiranës, Erion Veliaj, kryetarit të Qarkut dhe Këshillit Bashkiak, Aldrin Dalipi, ministrit të Infrastrukturës dhe Energjetikës, Damian Gjiknuri, ministrit të Mjedisit dhe Turizmit, Blendi Klosi, ambasadorit të Polonisë në Shqipëri, Karol Bachura, kompania e njohur polake “Solaris”, autobusët e së cilës përdoren në 32 vende të botës, prezantoi sot mjetin elektrik që do të testohet në linjën urbane Kinostudio-Kombinat.
Me këtë teknologji, kryeqyteti po ndjek të njëjtin hap zhvillimi si dhe shumë qytete të zhvilluara në botë. Kjo teknologji do të aplikohet edhe nga kompanitë që operojnë në fushën e transportit publik.
Për të bërë të mundur realizimin e këtij synimi, në bashkëpunim edhe me qeverinë qendrore do të jepen incentiva për operatorët privatë që të përqafojnë sa më shpejt këtë teknologji që mbron mjedisin.
