Qarku Tirane

Zv.ministrja e Brendshme: Do forcohet roli i Këshillit të Qarkut

Published at : 13/09/2019 - 20:28

Pas konstituimit të këshillave bashkiakë të dala nga zgjedhjet e 30 qershorit janë zhvilluar zgjedhjet edhe në Këshillat e Qarqeve, si niveli dytë i qeverisjes vendore ku janë zgjedhur drejtuesit e rinj në 12 qarqet e vendit.

Në Tiranë kryetari i Qarkut u rizgjodh Aldrin Dalipi, i cili mori besimin me votë në këtë detyrë për 4 vitet e ardhshme.

Zëvendësministrja e Brendshme, Romina Kuko e pranishme në aktivitet u shpreh se katër vitet e ardhshme roli i Këshillit të Qarkut do të forcohet. Kuko ka vlerësuar kreun e Qarkut Tiranë Aldrin Dalipi për profesionalizmin dhe vullnetin për punë të mira në krye të Qarkut ndërsa ka shprehur bindjen për fuqizimin e këtij institucioni.

“E bindur se këtë mandat Qarku Tiranë do të vazhdojë fuqizimin në gjithë potencialin e vet. Mbështetje maksimale nga Ministria e Brendshme” u shpreh Kuko.

Këshilli i Qarkut është institucioni i nivelit të dytë të qeverisjes vendore në Shqipëri dhe funksionet e qarkut janë; ndërtimi e zbatimi i politikave rajonale si dhe harmonizimi i tyre me politikat shtetërore, në nivel qarku.

Qarku është institucion ekzekutiv dhe përfaqësues, ndërsa në Shqipëri janë 12 institucione të tilla me kompetenca të plota ligjore dhe me bashkëpunime projektesh me rajonet e Europës.

Marrë nga Tirana News