Qarku Tirane

Tirana, një qytet solidar ku do gjejnë veten të gjitha moshat

Published at : 15/12/2015 - 18:11

Në ambientet e Këshillit Bashkiak të Tiranës u zhvillua sot takimi i parë mes Bashkisë dhe të moshuarve të cilët tashmë do të përfaqësohen nga Këshilli i Moshës së Tretë, për të ndjekur nga afër vendimmarrjet e bashkisë.

Kryetari i Bashkisë së Tiranës, z.Erion Veliaj, mblodhi në ambientet e sallës së Këshillit Bashkiak, një grup të moshuarish me të cilët diskutoi mbi situatën aktuale ku ndodhet bashkia dhe sfidat e së ardhmes.

Kryetari i Bashkisë, z. Erion Veliaj së bashku me Kryetarin e Këshillit të Qarkut dhe Këshillit Bashkiak, z. Aldrin Dalipi sqaruan se ashtu si Këshilli Rinor, do të kemi gjithashtu edhe Këshillin e Fëmijëve.

Të gjithë anëtarët e Këshillit të Moshës së Tretë do të kenë mundësi që të shpërndahen në disa komisione, të cilat do të prodhojnë qëndrime të unifikuara për çështje të caktuara. Për sa i përket angazhimeve të Bashkisë së Tiranës pjesë e Qarkut Tiranë, kryebashkiaku tha se këtë vit, do të vendoset në buxhet një fond mirëmbajtje për varrezat në Pezë dhe për Varrezat e Dëshmorëve.

Kreu i Qarkut të Tiranës dhe Këshillit Bashkiak, z. Dalipi u shpreh se “Tirana duhet dhe do të jetë një qytet solidar ku të ndihen rehat të gjitha moshat”.

Gjatë takimit të parë të Këshillit të Moshës së Tretë, pjesëmarrësit diskutuan dhe adresuan problematika të ndryshme për t’i pasur Bashkia në planin e saj të punës.