Qarku Tirane

Tiranë – Prishtinë, platformë bashkëpunimi mes dy kryeqyteteve shqiptare

Published at : 15/09/2016 - 15:17

Tirana dhe Prishtina do të rrisin bashkëpunimin mes tyre për përmirësimin e jetës së qytetarëve të dy kryeqyteteve shqiptare, por edhe për të mundësuar një organizim më të mirë të të gjitha bashkive që drejtohen nga shqiptarët në rajonin e Ballkanit. Kryetari i Bashkisë së Tiranës, Erion Veliaj, kryetari i Qarkut Tiranë dhe Këshillit Bashkiak, Aldrin Dalipi dhe drejtues të Bashkisë dhe Këshillit Bashkiak zhvilluan një vizitë në kryeqytetin e Kosovës. Takimet nisën me kryetarin e Komunës Prishtinë, Shpend Ahmeti ku biseda u fokusua te shkëmbimi i praktikave më të mira mes dy njësive vendore shqiptare dhe zbatimin e tyre në të mirë të përmirësimit të shërbimit ndaj qytetarëve dhe zhvillimin urban të dy qyteteve. Për t’i bërë sa më efektive këto shkëmbime praktikash, por edhe çdo ide që zbatohet në të mirë të qytetarëve, u theksua se është e rëndësishme që politika t’i lërë bashkitë të punojnë. Pjesë e diskutimit ishte edhe organizimi më i mirë dhe funksional i Unionit të Bashkive Shqiptare. Kryebashkiaku i Tiranës tha se për këtë janë hedhur hapa konkretë, që do të vihen në zbatim në prag të festës kombëtare të Pavarësisë së Shqipërisë. Në vizitën e Prishtinës, përveç kryetarit të Bashkisë së Tiranës, Erion Veliaj dhe kryetarit të Qarkut Tiranë dhe Këshillit Bashkiak ishin të pranishëm edhe nënkryetarët e Bashkisë së Tiranës, Brunilda Paskali dhe Andi Seferi, si dhe anëtarë të tjerë të Këshillit Bashkiak. Ata, gjithashtu u pritën edhe nga Kryeministri i Republikës së Kosovës Isa Mustafa, Kryetarin e Kuvendit, ministrin e Punëve të Jashtme, Enver Hoxhaj, dhe këshilltarë komunal, etj .